Bashkitë dështojnë me investimet, Tirana vetëm 14 për qind të planit vjetor, kryeson Kamza

Bashkitë kanë realizuar vetëm 20.7% të investimeve vjetore deri në gusht. Tirana arrin 14%, ndërsa Kamza kryeson me 64.9%.

Bashkitë në Shqipëri vijojnë të përballen me vështirësi në realizimin e investimeve kapitale, pavarësisht nevojave të mëdha për infrastrukturë, rrugë dhe furnizim me ujë, veçanërisht në zonat rurale. Të dhënat zyrtare të Ministrisë së Financave tregojnë se gjatë tetëmujorit të parë të vitit 2026, pushteti vendor ka realizuar vetëm 20.7% të planit vjetor të investimeve, duke shpenzuar 11.9 miliardë lekë, ose rreth 128.5 milionë euro, nga 57.6 miliardë lekë (620 milionë euro) të planifikuara për të gjithë vitin.

Kjo do të thotë se rreth 80% e fondeve të planifikuara, ose afërsisht 491 milionë euro, mbeten për t'u shpenzuar gjatë katër muajve të fundit të vitit. Të dhënat tregojnë diferenca të konsiderueshme ndërmjet bashkive, ku Kamza dhe Lezha kanë regjistruar nivele relativisht të larta realizimi, ndërsa bashkitë me buxhete të mëdha, si Tirana dhe Durrësi, si dhe bashkitë bregdetare Vlorë e Himarë, kanë përdorur vetëm një pjesë të vogël të fondeve të parashikuara.

Tirana me buxhetin më të madh, por realizon vetëm 14 për qind të investimeve

Bashkia e Tiranës ka buxhetin më të madh të investimeve vendore, me rreth 16.32 miliardë lekë të planifikuara për vitin 2026. Megjithatë, deri në fund të muajit gusht, shpenzimet faktike kishin arritur në vetëm 2.29 miliardë lekë, ose 14% të planit vjetor. Në vlerë absolute, Tirana renditet e para për shumën e investimeve të realizuara, por niveli i përmbushjes së planit është ndjeshëm më i ulët se mesatarja kombëtare e bashkive prej 20.7%.

Situatë e ngjashme paraqitet edhe në bashkitë e tjera me buxhete të konsiderueshme. Himara ka shpenzuar 821.6 milionë lekë nga 7.74 miliardë lekë të planifikuara, duke realizuar vetëm 10.6% të investimeve. Në Durrës, shpenzimet kanë arritur në 646.3 milionë lekë nga 5.17 miliardë lekë të planifikuara, ose 12.5% e totalit.

Në Bashkinë e Vlorës, realizimi i investimeve është rreth 10%, me 399 milionë lekë të shpenzuara nga afro 4 miliardë lekë të planifikuara. Nivele edhe më të ulëta regjistrohen në Shkodër, ku janë realizuar vetëm 9.1% e investimeve, dhe në Korçë, ku niveli i realizimit arrin në 6.8%.

Kamza kryeson me 64.9 për qind, pas saj Lezha dhe Kuçova

Në ndryshim nga shumica e bashkive të mëdha, Kamza ka regjistruar nivelin më të lartë të realizimit të investimeve gjatë tetëmujorit të parë të vitit. Nga 2.1 miliardë lekë të planifikuara, kjo bashki ka shpenzuar 1.36 miliardë lekë, duke realizuar 64.9% të buxhetit vjetor të investimeve.

Pas Kamzës renditet Bashkia e Lezhës, me një nivel realizimi prej 51.6%, ndërsa Kuçova ka shpenzuar 50.3% të fondeve të planifikuara. Nivele relativisht të larta të realizimit të investimeve janë regjistruar edhe në bashkitë Cërrik, Malësi e Madhe, Sarandë dhe Bulqizë.

Diferencat mes bashkive tregojnë ritme të ndryshme të përdorimit të fondeve për investime kapitale, ndërkohë që një pjesë e konsiderueshme e buxheteve vendore mbetet ende e pashpenzuar.

Projektet e banesave sociale dhe Teatrit të Tiranës pa shpenzime të regjistruara

Të dhënat e Ministrisë së Financave tregojnë se një numër projektesh të rëndësishme, për të cilat janë parashikuar fonde në buxhetet vendore, nuk kanë regjistruar shpenzime deri në fund të muajit gusht.

Në Bashkinë e Tiranës, për investimet në ndërtimin e banesave sociale janë planifikuar 1.7 miliardë lekë, por realizimi financiar i regjistruar për këtë zë është zero. Po kështu, shtesa e kontratës për godinën e Teatrit të Tiranës, me një buxhet prej rreth 445 milionë lekësh, rezulton pa shpenzime të regjistruara gjatë periudhës së raportimit.

Në Bashkinë e Durrësit, projekti për rikonstruksionin dhe riparimin e banesave individuale, me një buxhet prej 511 milionë lekësh, nuk ka regjistruar realizim financiar. E njëjta situatë konstatohet për rindërtimin e godinës nr. 32, për të cilën janë planifikuar rreth 380 milionë lekë, si dhe për rikonstruksionin e Pallatit të Kulturës, me një fond prej rreth 331 milionë lekësh.

Edhe në Bashkinë e Himarës, projekti për ndërtimin e shëtitores së Borshit, LOT I, me një buxhet prej rreth 459 milionë lekësh, rezulton pa shpenzime të regjistruara në zërin përkatës buxhetor deri në gusht.

Realizimi financiar zero nuk nënkupton domosdoshmërisht mungesën e punimeve

Megjithatë, mungesa e shpenzimeve të regjistruara për një projekt nuk do të thotë domosdoshmërisht se punimet nuk kanë nisur. Një realizim financiar zero tregon se deri në datën e raportimit nuk janë regjistruar pagesa për zërin përkatës buxhetor, pavarësisht fazës në të cilën mund të ndodhet zbatimi fizik i projektit.

Realizimi i investimeve kapitale mbetet një tregues i rëndësishëm i kapaciteteve të administratës vendore për të shndërruar fondet e planifikuara në projekte konkrete infrastrukturore dhe shërbime publike. Me vetëm katër muaj të mbetur deri në përfundim të vitit, bashkitë përballen me nevojën për të përshpejtuar përdorimin e fondeve të investimeve, ndërsa pjesa më e madhe e buxhetit vjetor mbetet ende e parealizuar.

Burimi: Monitor

Më të lexuarat